АРХИДАН СОГТУУРЧ ХҮНИЙГ АЛАХ ГЭМТ ХЭРЭГ ҮЙЛДСЭН ЭТГЭЭДЭД ХОРИХ ЯЛ ОНОГДУУЛАВ.

Дорнод аймаг дахь сум дундын анхан шатны шүүхийн 2025.11.25-ны өдрийн №354 шийдвэр

Шүүхийн шийдвэрийн тойм  2025.11.25

Шийдвэрийн төлөв: Хүчин төгөлдөр болоогүй.

Санамж: “Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.”

Дорнод аймгийн Прокурорын газрын хяналтын прокуророос “Н”-г Эрүүгийн хуулийн тусгай ангийн 10.1 дүгээр зүйлийн 1 дэх хэсэгт заасан гэмт хэрэгт холбогдуулан яллах дүгнэлт үйлдэж гэм буруутай эсэхийг шийдвэрлүүлэхээр хэргийг шүүхэд ирүүлжээ.

Шүүгдэгч “Н” нь 2025 оны 06 дугаар сарын 09-ний өдөр 23 цагийн орчим согтуугаар Дорнод аймгийн Хэрлэн сумын ... дугаар баг ...... дугаар байрны урд хэсэгт үл ялих шалтгааны улмаас хохирогч “Ц”-ийн хэвлийн тус газарт хутгалж алсан үйл баримт хэргийн хүрээнд тогтоогдож байна.

“Н” нь дээрхи гэмт хэрэг үйлдсэн гэм буруутай болох нь хэрэгт авагдсан нотлох баримтуудаар нотлогдсон бөгөөд шүүхээс “Н”-г хүнийг алах гэмт хэрэг үйлдсэн гэм буруутайд тооцож, гэмт хэрэг үйлдсэн нөхцөл байдал, учирсан хохирол, хор уршгийн шинж чанар, шүүгдэгчийн хувийн байдал зэргийг харгалзан үзэж 10 жилийн хорих  ялаар шийтгэсэн.

Мөн шүүгдэгч “Н”-ээс гэмт хэргийн улмаас учруулсан хохирол, хор уршигт нийт 155,085,070 төгрөгийг гаргуулж хохирогчийн хууль ёсны төлөөлөгчид, Эрүүл мэндийн даатгалын сангаас хохирогчийн эмчилгээний зардалд зарцуулсан 1,839,972 төгрөгийг гаргуулж Эрүүл мэндийн даатгалын санд тус тус олгохоор шийдвэрлэв.

Санамж: Энэ хураангуй нь шүүхийн бүрэн гүйцэд шийдвэр биш бөгөөд түүнийг орлохгүй, зөвхөн олон нийтэд ойлгомжтой байдлаар мэдээлэл хүргэх зорилготой болохыг тэмдэглэв. Шийдвэрийн дэлгэрэнгүй мэдээлэлтэй ЭНД ДАРЖ танилцана уу.