ТОРГОХ ЯЛАА ШҮҮХЭЭС ТОГТООСОН ХУГАЦААНД ТӨЛӨӨГҮЙ БОЛ ХОРИХ ЯЛААР СОЛИНО

Шүүхийн нэр, шийдвэрийн дугаар: Дорнод аймаг дахь сум дундын анхан шатны шүүх, 2025.11.04, 2025/ХМШЗ/23

Шийдвэрийн төлөв: Хүчин төгөлдөр болоогүй

 

Шүүхийн шийдвэрийн тоймын огноо: 2025.11.25

Санамж: "Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.”

Ялтан Б-г шүүхээс оногдуулсан торгох ялаа тогтоосон хугацаанд төлөөгүй учир хорих ялаар солиулах тухай шийдвэр гүйцэтгэгчийн санал, прокурорын дүгнэлтийг тус шүүхэд ирүүлсэн байна.  

 Дорнод аймаг дахь сум дундын анхан шатны шүүхийн 2025 оны ... дүгээр сарын ...-ний өдрийн ... дугаартай шийтгэх тогтоолоор ялтан Б-г Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар хүний эрүүл мэндэд хөнгөн хохирол санаатай учруулсан гэмт хэрэг үйлдсэн гэм буруутайд тооцож, 500 нэгжтэй тэнцэх хэмжээний буюу 500,000 төгрөгөөр торгох ялаар шийтгэж, уг ялыг 3 сарын хугацаанд хэсэгчлэн төлөхөөр тогтоож шийдвэрлэжээ.

 Шүүхийн шийдвэр гүйцэтгэх газраас 2025 оны 05 дугаар сарын 20-ны өдөр ялтанд эрүүгийн шийдвэр гүйцэтгэх ажиллагаа үүсгэн эрх үүргийг танилцуулж, шүүхийн шийдвэр биелүүлэх мэдэгдэл гардуулан баталгаа гаргуулах гарын үсэг зуруулж, торгох ялаа хугацаандаа төлөх талаар мэдэгдэж, зөрчсөн тохиолдолд хүлээлгэх хариуцлагыг танилцуулан ажилласан байна.

Ялтан Б нь шүүхээс тогтоосон 3 сарын хугацаанд 500,000 төгрөгөөр торгох ялаас 250,000 төгрөгийг төлж, торгох ялыг бүрэн биелүүлээгүй болох нь шүүхийн хэлэлцүүлэгт түүний зөрчил гаргаснаа хүлээн зөвшөөрсөн тайлбар, эрүүгийн шийдвэр гүйцэтгэх ажиллагааны хяналтын хувийн хэрэгт авагдсан баримтуудаар тогтоогдсон болно.

Шүүхээс Эрүүгийн хуулийн ерөнхий ангийн 5.3 дугаар зүйлийн 5 дахь хэсэгт зааснаар ялтан Б-д оногдуулсан 500 нэгжтэй тэнцэх хэмжээний буюу 500,000 төгрөгөөр торгох ялаас биелүүлээгүй үлдсэн 250,000 төгрөгийн арван таван нэгжтэй тэнцэх хэмжээний төгрөгийг нэг хоногоор тооцож 16 хоногийн хорих ялаар сольж, уг ялыг нээлттэй хорих байгууллагад эдлүүлэхээр шийдвэрлэв.

Санамж: Энэ хураангуй нь шүүхийн бүрэн гүйцэд шийдвэр биш бөгөөд түүнийг орлохгүй, зөвхөн олон нийтэд ойлгомжтой байдлаар мэдээлэл хүргэх зорилготой болохыг тэмдэглэв. Шийдвэрийн дэлгэрэнгүй мэдээлэлтэй ЭНД ДАРЖ танилцана уу.